Велигден 2008
во Македонија

26.04.2008

Велигденска порака на Архиепископот
Охридски и Македонски г.г. Стефан

 

Возљубени празникољубци,

Денот на Христовото воскресение од нашиот благочестив народ е наречен Велигден. И, навистина, нема друг ден – сотаков настан, ден со таква победа и ден од кој се роди толкава радост!

Христос воскресна – и се исполнија пророштвата, се остварија очекувањата и надежите станаа реалност.

Тој ден е најзначајниот во сета историја на светот и човекот, зашто на тој ден блеснаа светлината и вистината и во тој ден изгреа од Христа Сонцето на правдата.

Голем е тој ден оти победена е неправдата со правда, зошто со Воскресението и Евангелието извршена е преобразба во животот на луѓето.

Голем и најголем е овој ден зашто е празник во кој торжествува животот и од кој што извираат љубовта и надежта.

Тој е денот кој ја роди и ја раѓа постојаната радост. А за да ја доживееме и ние радоста од празниот гроб, потребно ни е да се утврдуваме во вистината и правдата, да растеме во љубовта и благочестието, во трпението и милосрдието – да живееме во верата со добри дела. Само доколку нашиот живот го крастат такви добродетели – тогаш сме ја разбрале смислата на Настанот од овој ден пред 2000 години.

Ние сме народ кој знае да се радува на Велигден и на сите празници, како што знае и да трпи страданија, да поднесува голготи и распетија. На овој спасоносен ден посакувам Воскреснатиот Господ да ни дарува сили да истраеме во искушенијата и неправдите, да го зачуваме духовниот мир и националното достоинство, зошто така ни доликува како на древен, охристовен и богољубив, библиски и човекољубив народ, и да покажеме единство во верата и почитување во меѓусебните однесувања.

Господ Сепобедителот, нека не’ чува во радоста на празникот и во љубовта евангелска, за да можеме де ги почувствуваме и да живееме постојано велигденски. Амин! Христос воскресе!

 

Архиепископот Охридски и Македонски
г.г. Стефан

____________________________

tema1.net